Tagesausflug am letzten Mittwoch vor der Sommerpause, 28. Juni 2017

Veröffentlicht am 2. Jul. 2017 von

 

Üsä Usflug 
grossartigscht Kuchi vo Frauäfäld

Än Car voll menschlichi Spezialitäte
voll Läbesgschichte, Brüch, Chrankheitä
und tuusig anderä Kalamitätä
Üs fahrt en Engel namens Daniel
machts ohni Tadel, ohni Fehl

S isch halbinüüni am Morgä, mir schtönd im Rägä
Trotz tunklä Wolkä hämmer beschti Luunä
Petrus wird dä Himmel scho ufruumä
Also iischtiigä voranä no go bislä
und denn sofort los dä Sunn entgägä

Chuum fahred mir uf de Autibahn,
lueget d Sunn dur vill Wolkälöcher 
und de Petrus git sis Letscht
Bald nuno blau das Zelt ischs jetzt 
Di frisch putzti Welt wird warm und tröchner
so langed d Hosä mit dä Löcher

In Wittä oder Hitte oder wie da heisst
do schtoht äs Schloss sit tussig Johr (Heidegg)
Sie sägäd's s isch wol wohr
Än Rosägartä herzig schöön
Än Blick id Wiiti voll geil bi Föhn
Kafi Gipfeli, Orangejus git mä üs ohni wartä,
denn sitzed mir in Gartä

Und wenn du do hocksch und ächli los lohsch
tänksch segsch dä Schlossherr do
wo all di Pracht hät bauä lo
Herz und Seelä gönd grad chli uf
scho heisst's vo vornä iischtiigä 
di nögscht Etappä in Aagriff näh

So fahrt dä Ängel Daniel sin Öpfelcar ganz ruhigä 
dur d Landschaft würkli richtig schön, da zuet mi schön beruhigä
S goht uf Beinwil, liit idyllisch am See vo Hallwil,
am Wasserschloss verbii
Gägänd gsehnd mär ganz vill
doch isch's s Seehotel wo i härä will
Döt gits bald super Ässä,
Salot, Schtokki und Fleischvögel hämmer gässä
Dä Kafi gits denn ufäm Schiff
Mensch da Programm hät richtig Pfiff

Bald chunnt dä Dani wieder draa
fahrt jetzt mit üs zum Flughafaa (s'reimt sich besser)
Mir händ denn welä flüügä hei
da passäti äm Schoföör nöd
Nei echt, er fänd da würkli blöd
muess er doch neh dä Car mit hei
Schnell hämmer alli Iisicht zeigt
mir sind jo schtets kompromissbereit
wenn's denn halt nöd andersch goht
fahr Dani, susch wird's z'spoht

Äs isch denn au kei Schtund vergangä
tot er mit üs dehei aaglangä
äs "tschüss" an schönä Summer,
kei Sorgä und kein Chummer
wünscht jedi jedem no
Än Supertag zum End isch choo
Danke Sandy für's Organisierä
abem 6. September chömäd mir wieder zu dir go diniärä

die grossartigscht Kuchi vo Frauenfeld 
hät hüt än neuä "guätä schtimmigs Rekord" ufgschtellt
(Pefi am Tag und am Tag danach)

Kommentare sind geschlossen.